مارس 30, 2014
كلماتى، قصائد وخواطر
ذكرياتى
قصة حلوة متشكلة من 4 حروف
ذكرياتى ابتسامة ونبض خوف
حلم صافى فيه تشوف
الحياة أجمل ما فيها
قلب عاشق ونظرة كسوف
وذكرياتى اللى هتسمعيها
جوا قلبك تحفريها
وان قدرتى تحضنيها
احمى قلبى من الظروف
احمى قلبى من غرورى وكبريائى
مش كل يوم أصبح ألاقى
ملكة بترتب لى يومى
ترسم الشمس بإديها
تلون الدنيا بابتسامة
وان مرت فى سمايا يمامة
تنزل المطرة قلوب
فى حلمى دايما كانت شفايفك
ترسم الحاضر وشايفك
بتلونى احزانى فرح
بتجرى تداوى ألف جرح
رغم ألمك من جروحى
الابتسامة جوا قلبك
محتاجة لها الف شرح
ليه بتجرى تستخبى
جوا احلامى الكتير
مش انتى اللى قولتى
انك ملكة
ليه رافضة انى اكون ليك أمير
ولا يمكن علشان ردودى
ما انتى عارفة
قلب خايب ولسانى اخيب
ولو هتحاسبينى ...
هو فعلا قلبلى محتاج للحساب
فاكرة خيبتى فى الحساب
لما قولتيلى اجمع
قلبى وقلبك يسوى كام
كان ردى اغبى من الطبيعى
هو يعنى كان طبيعى
ان اجمع قلبين فى واحد
وساعتها ردك كان مفاجأة
ضحكة طلعت كدا فجأة
وبعدها كان السكوت
مكنتش اعرف ان ضحكتك
النوبة دى معناها موت
ومات القلب اللى حبك
وفضلت منه ذكرياتى
ذكرى رسالة كتبتهالك
بتمر يوماتى قدام عيونى
فيها كاتب يا أهل العشق اقتلونى
اعدمونى لو فى يوم قلبى خانها
اتارينى بكدب وضحكتك
كنت انا سجانها
فمتسامحيش
بس سيبى ذكرياتى
فى احزانها تعيش
سيبيلى احلامى دى اللى فاضلة
ولانك معايا كنتى فاضلة
فذكرياتى متتحكيش
