ديسمبر 13, 2015
القسم الادبى ، كاتب وكتاب
#خمسة_الصبح
كل بواقى الليل بتروح
ناس بتغمض وتسلم
وردية الغلب
لناس بتفتح
وتشطب عربية الكبدة
وتعلق يافطة مقفول
فبسرعة الفيرس يتحول عربية فول
وكماين الشرطة المبدورة
ببتسلى على بلاوى الناس بتمشى الناس
هى كمان زهقت من الوقفة عايزة تروح
#خمسة_الصبح هو الوقت الأمثل ليها
انها تفتح شيش الأوضة
تطرد كل كلام السهرة الجارح
هو الوقت الفاصل بين دلوقتى وبين امبارح
كنا زمن نسهر على الراديو نتصاحب على أى كتاب
دلوقتى بيسهروا على اللاب
وتكلم بالمليون واحد
الصادق فيهم كداب
كنا زمان ما بينا مسافة وبينا بلاد
دلوقتى بنسهر مع بعض لخمسة الصبح بس بُعاد
#خمسة_الصبح هو سكوت الفجر فى شقة ستى
وخرير الميّة وهى بتتوضى فى عز البرد
كانت حافظة مكان الراديو وكوبس النور
وأزاى يشتغل القرآن وازاى بتعلى
وانت بتعمل نفسك ميت لتصحيك وتقولك صلى
والعصافير يستفردوا بيك
صوتهم يعلى ويصحيك
#خمسة الصبح البنت اللى عنيها امبارح
كانت قتالة ودباحة
يبدأ تتسحب بالراحة
وتغير لبس الكباريه وتلبس واسع
كالعادة التاكسى ميرضاش يدخل فى الحارة
وينزلها فى لآخر الشارع
تنزل تمشى
جوا ودانها الرقص وضحك الناس والخمرة
من جواها الدنيا بتشغى
لكن بره محدش سامع
والفقر أما بيفرض جوعه
تتغيرله فى بنود العقد
بين الشارى وبين البايع
المشهد مفهوش تفاصيل
غير بنت لوحدها فى الشارع
محليتهاش غير جسمها يفضل حلو شوية
وحلمها يفضل طول العمر الباقى ضايع
#خمسة_الصبح خش عليها البيت يستلوح
كان سكران ، كان سكران ماشى بيطوح
كانت جارته بتكوى هدوم جوزها الشقيان
وبتقفل بلكونة الصالة
علشان عرفاه هيقوم عرقان
والبواب غسل العربية ونشف إيده
فبسرعة المشهد يتحول عبد وسيده
افتح لي المشهد ع الآخر
هاته لغاية آخر كادر
مابيطرحش الملح خضار
ولا يبنيش الأوطان غدر
والقمر اللي يبات طفيان
غير القمر اللي يبات بدر
آه يا سواقي الميّة الهَدْر
لِسّاكِ عفيّة وبتدُّوري
الحب عشان يطرح ناس
مش محتاج فارس أسطوري
الحب عشان يطرح ناس
مش مستني قرار جمهوري
خمسة الصبح
اتقيّد ضد المجهول
محضر قتل الطفل السوري
آه يالبت اللي بتتلوّى
ولا في الرقص عرفتِ تهزّي
ولا في الثورة عرفتِ تثوري
ليلك زى البحر الهيج
ولا مركب هيكمل طافى
وسلاسل نورك كرابيج
وفنارك متغطى وطافى
وانا متعود
يا اما البحر حدف اشكال
وإسأل على راسى الطبال
إسأل عن شبكى وخطافى
أنا جدر وغارز فى الرملة
أما الضيف اللى بيتسلى
دا بيجى ويروح خطافى
فسأل عن شبكى وخطافى
#خمسة_الصبح بتاعة الفقرا
غير خمسة الصبح البشوات
والصحيان علشان الرحلة
غير صحيان الامتحانات
وسكوت الشاعر احيانا
مش معناه ان الشاعر مات
#خمسة_الصبح
وقت لكل الاحتمالات
اللي يعرّض
واللي يكشكش
واللي يصلي
واللي يفحشّ
واللي يغني
واللي يحشش
واللي يونّس
واللي يلبشّ
واللي كتير احلو عشانه
وهوا يوحشّ
وأما أزعل وأتكلم عنه
يتنرفز ويقول ميصحش
#خمسة الصبح الوقت المنعش
الوقت المدهش
كل حاجات الليل بتروح
كل خيوط الصبح تفتح
لسه حبيبتى السمرا
لسه رموش السمرا حبيبتى
سهام بتدبح
لسه العصافير اللى سايبها
فى شجرة بيتنا بتصحى تسبح
لسه المشهد زى ما هو
ناس بتشوفه فى غاية الروعة
وناس بتشوفه فى غاية القبح
وانا بتريق عالاتنين
وبسهر وحدى لـ #خمسة_الصبح