مايو 31, 2015
#اعرف_طفلك | الطاهرة عمارى
اهلا بيكم مرة تانية على "برامج شاعر الحرية " حيث نستعرض لكم الجزء الثانى من موضوع #الفطام من اعداد الكاتبة المتميزة "الطاهرة عمارى " تناولنا فى الموضوع السابق اهم الكوارث التى تحدث نتيجة الفطام الخاطئ للاطفال "ممكن تتابعوا الجزء الول من الموضوع على الرابط ده كيف تفطمين طفلك #الفطام | | #اعرف_طفلك | #الطاهرة_عمارى" .
بشكل عام لازم نعترف ان الفطام مرحلة صعبة جدا على الأم والطفل وليها اثر نفسى قوى جدا خاصة مع الطفل الأول نتيجة لان الام بتكون متعلقة بيه وملهوفة على بكاءه . الفطام بالنسبة لعلم الصحة النفسية عبارة عن تحول فى اسلوب تعذية الطفل بيعمل تطور نفسى لكل من الأم والطفل .. والتطور ده شئ مهم واساسى لازم يحصل لان مش هينفع الطفل يفضل فى مرحلة الرضاعة طول الوقت .. وكمان لازم يبدأ يعتمد على نفسه .. والأكل هو أول مراحل الأعتماد على النفس
وبصفة عامة الأطباء بينصحوا بعدم فطام الطفل بشكل كامل قبل مايتم سنتين عشان ميكونش ليه تأثير سلبى على مشاعر الطفل وعشان يفضل مستفيد من تغذيتة بالأجسام المضادة الموجودة فى حياتة لبن الام . ومن الناحية الشرعية ربنا حدد فترة تمام الرضاعة الطبيعية للطفل عند بلوغه السنتين من عمره فى قوله تعالى فى سورة البقرة : (( وَالْوَالِدَاتُ يُرْضِعْنَ أَوْلادَهُنَّ حَوْلَيْنِ كَامِلَيْنِ لِمَنْ أَرَادَ أَن يُتِمَّ الرَّضَاعَةَ))
وفى سورة الأحقاف : (( وَوَصَّيْنَا الإِنسَانَ بِوَالِدَيْهِ إِحْسَانًا حَمَلَتْهُ أُمُّهُ كُرْهًا وَوَضَعَتْهُ كُرْهًا وَحَمْلُهُ وَفِصَالُهُ ثَلاثُونَ شَهْرًا))
وبما ان الحمل الطبيعي بيكون عادة تسع شهور فيكون موعد فصال الطفل من رضاعها ( الفطام ) بعد 21 شهرًا يعنى تقريبا سنتين
نيجى بقى لأهم نقطة اللى كتير من الأمهات بتسأل عنها : طريقة فطام الأطفال الصحيحة ؟ وازاى ممكن نعدى مرحلة الفطام بأمان من غير ما الطفل يتعرض لأى أثار سلبية .
مرحلة فطام الاطفال مرحلة فاصلة فى حياة الطفل .. ليه ؟ .لان فيها بيتم الاستغناء عن حليب الأم والإعتماد على مصادر الغذاء الخارجى يعنى الأكل العادى والمفروض انها تتم بشكل تدريجى لحد ما الطفل يمتنع تماما عن الرضاعة .
لكن اللى بيحصل ان بتلجا كثير من الامهات الى فطام الطفل فجأة وبتمنع الرضاعة الطبيعية او الببرونة فجأة وطبعا ده خطأ كبير جدا لانه بيسبب مشاكل نفسية وجسمانية للطفل شرحنا جزء منها فى الأول .
طيب خلينا نعرف الفطام صح .. الفطام يعني استبدال وجبة جديدة غير الحليب مكان رضعة من الرضعات اللى بياخدها الطفل خلال اليوم .. يعنى اول رضعة هنبدأ نستبدلها يبقى كده بدأنا فى مرحلة الفطام .. وبالتالى نقدر نقول ان الفطام بالمعنى ده بيبدأ من الشهر الرابع الى الشهر السادس من عمر الطفل لما بنبدأ نضيف أول وجبة خارجية .
أحياناً بيحصل حاجه بنسميها الفطام الذاتي .. بعض الأمهات هتلاقيه حصل معاها ده بيكون ان الطفل بأرادته بيمتنع عن الرضاعة لأسباب كثيرة ممكن يكون أهمها انه عجبه الأكل اللى بيتقدم له مكان الرضعات اكتر من طعم اللبن .. او عجبه استخدام الببرونة عشان اسهل واسرع بالنسبة له .. طبعا النوع ده من الفطام مش هنحتاج فيه اى خطوات ومش هيكون فى اى اضرار نفسية على الطفل
لكن لو جينا لطريقة الفطام للطفل العادى ؟
والطريقة المثالية للفطام بشكل عام لازم تعتمد على التدريج، وعلى مدى شهور مش شهر أو اثنين أو يوم أو يومين ، او على الاقل نحاول ندرج فيها بقدر المستطاع على قدر ما يسمح لنا الوقت ده فى حالة اذا كان فى اضطرار لده زى الحمل مثلا اثناء الرضاعة او ظروف صحية معينة للأم بحيث ان الفترة الزمنية لازم تكون كافية لتحويل الرضيع من الاعتماد على حليب الأم أو حتى الرضاعة الصناعية إلى الاعتماد على الطعام العادي وبعدها على حليب غير حليب الأم.
وعشان معدة الطفل الرضيع تتقبل ده بدون مشاكل صحية – فضلا عن المشاكل النفسية – لازم ده يتم بالتدريج . وخلال موضوع تانى هنبقى نتكلم عن اهمية ومزايا الرضاعة الطبيعية بس خلينا هنا ننقول ان من اهم مميزاتها ان كل العناصر الغذائية الموجودة فى لبن الأم ربنا خلقها بشكل قابل للأمتصاص والمعالجة بشكل ميسر بالنسبة لمعدة الرضيع اللى لسه معندهاش القدرة على التعامل مع العناصر الغذائية فى الاكل العادى وخصوصا اللبن العادى ولو حصل ده بيحصل اضطرابات معوية ومشاكل صحية كتير.
كمان من أهم فوائدها الكثيرة أنها بتقوي جهاز مناعته ضد كثير من الأمراض ، بالأضافة إلى أنها تقوي الرابطة العاطفية بين الأم والطفل
وقبل ما نتكلم عن الطريقة المثالية للفطام لازم نتكلم عن شوية نقط مهما لازم ناخد بالنا منها عند بداية الفطام :
1- بقدر المستطاع نتجنب ان بداية الفطام تكون فى الصيف عشان نجنب الطفل خطر الإصابة بالنزلات المعوية.
2- لازم الطفل يكون صحته كويسة يعنى مينفعش نبدأ نفطم الطفل وهو عنده اى مشاكل صحية زى الانيميا او سوء التغذية ، أو النزلات المعوية، أو الحمى مثلا.
3- ماينفعش نبدأ الفطام بشكل سريع من غير تدرج عشان نفس السبب فى رقم واحد ده ممكن يعمل للطفل اضطرابات هضمية أو نزلات معوية.
4- لازم ناخد بالنا كويس جداااا من النظافة .. الأكل اللى هنبدأ نعود الطفل على الاعتماد عليه مش زى لبن الأم أبداً .. لبن الأم من مميزاته انه معقم ومش معرض لأى نوع من أنواع التلوث .. او بمعنى اصح يصعب تعرضه للتلوث لانه بيكون من ثدى الأم لفم الطفل مباشرة او حتى من الببرونة المعقمة لفم الطفل مباشرة وفى نفس الوقت الطفل كان معتمد على نوع واحد من التغذية اللى هواللبن فلما هنبدأ الفطام هنبدأ نزود الأنواع وده بيزود فرص التلوث والمشاكل الصحية .. مش محتاجين نقول اننا لازم نغسل ونطهرايدينا كويس قبل وبعد اعداد الطعام للطفل واثناء تغذيته .. وكذلك الأوانى اللى هنجهز فيها الأكل .. وكل احتياطات النظافة والسلامة المعتادة .
5- الدعم النفسى للطفل فى المرحلة دى مهم جدا عشان يقدر يساعده يتجاوز المرحلة دى وفى نفس الوقت الدعم النفسى من الأسرة للأم لانها مرحلة صعبة برضه بالنسبة لها سواء نفسياً من حيث ارتباطها بالرضاعة او حتى من ناحية قلقها وتوترها من توقف الرضاعة
خطوات فطام الطفل بشكل صحيح
- رقم واحد ( تقليل الرضعات ) :
مطلوب من الأم انها تبدأ تقلل من عدد الرضعات للطفل وده هيخلى الطفل يبدأ يفهم بشكل تدريجى او بيمهد له نفسياً للى هيحصل بعد كده .. وفى المرحلة دى الام بتحاول تكون حازمة الى حد ما يعنى لو قللت عدد الرضعات بتحاول تلتزم بده حتى لو الطفل الح عليها .. وطبعا بشكل تدريجى
- رقم 2 ( منع الرضاعة قبل النوم ):
ليه ؟ لان الرضاعة قبل النوم بتبقى عاملة زى المنوم للطفل لدرجة انه ممكن يستغنى عن اى رضعات تانيه اسهل من الاستغناء عنها . وفى المرحلة دى الام لازم تفضل مستمرة فى التدريج فى توقيف الرضاعة وتغيير عادة الطفل فى الرضاعة قبل النوم .. ، مثلا ممكن تعود الطفل على بديل زى حمام دافى قبل النوم او تغنى له أو تحكى له حدوتة قبل النوم لحد مايتعود ان فى حاجه تانيه ممكن تتعمل قبل ماينام غير الرضاعة
وعموما السبب الرئيسي لنزول الحليب في الثدى هو الرضاعة نفسها ، يعنى بمجرد ما نبدأ نقلل الرضعات .. كده كده هيبدأ يقل إفراز هرمون الحليب بالتدريج، ومع الوقت بيقل إفراز الحليب بالتدريج لحد مايتوقف تماما، وده فى حد ذاته بيساعد على الفطام، لانه مش هيلاقى حليب كفاية يشبع منه فبيبدأ يزهق ويبعد عم الثدي بالتدريج.
- رقم 3 ( الحنان )
دى ممكن نقول عليها خطوة ممتدة .. ونقدر نعتبرها توصية .. بس هنركز عليها اوى فى المرحلة دى .. ليه ؟ لان الرضاعة بالنسبة للطفل مش مجرد مصدر غذاء وبس .. جزء كبير من ارتباط الطفل بالرضاعة هو احساسه بأحتضان الأم ليه وقت الرضاعة والراحة فى شعوره ده .. ولو هنبدأ نقلل رضعات الطفل .. يبقى لازم فى نفس الوقت الأم تفضل محافظة على قربها من الطفل وتفضل تحضنه وتضمه لصدرها بشكل مستمر وتلعب معاه وتحسسه بحنانها عشان الطفل مايحسش انه افتقد الأم وحنانها وقت الفطام .. وعكس ما بعض الأمهات بتعمل .. لما مثلا تقرر انها تفطم الطفل بشكل مفاجئ بانها تبعده عن الثدى او تلبس ملابس مقفولة فبتبعد الطفل عن حضنهاعشان تبعد عن الحاحه فى طلب الثدى . الحنان فى المرحلة دى هيقلل الضغط النفسى اللى على الطفل وهيساعد ان المرحلة دى تمر بسلام .
- رقم 4 / أوعى تحاولى تغيرى طعم الثدى :
وده اللى اتكلمنا عليه فى أول الموضوع غير انه بيكون كتير تجربة شعورية ونفسية مؤلمة جدا للطفل تصل لوصفها بالتعذيب بالنسبة لرضيع ! .. فى احيانا اطفال بيفضلوا مستمرين فى الرضاعة بالرغم من الطعم المر لها وأحيانا بيتعودوا على الطعم الجديد وقتها الام هتضطر تختار طريقة اكثر قسوة للفطام .. ونزود الخطأ
كده تقريبا الموضوع خلص .. لكن لسه فى جزء مهم جدا للأمهات اللى محتاجه ترتب طريقة الفطام التدريجى للطفل .. هنزل لكم اكتر من برنامج تفصيلى بداية من الشهر الرابع حتى نهاية السنتين وطريقة فطام الطفل خلال الفترة دى شهر بشهر بالتفصيل الممل .. لو لسه فى الشهر الرابع ممكن تبدأى تمشى عليه تدريجيا ,, ولو عديتى الوقت ده هنرتب ازاى تضغطى البرنامج شوية وتمشى عليه بالتدريج بقدر المستطاع .
| للاجابة على استشاراتكم الخاصة قم بمراسلتنا عبر مجموعتنا على الفيس بوك
تربية طفلك مع #الطاهرة_عمارى