آخر قصائد هشام الجخ : ملك النحل

يوليو 08, 2014 ahmed fathy

على مشهد اللي افترَقْ

يِبكِي العَرَقْ وينُوحْ

إيَّاك تخافي الغَرَقْ

قلبي سفينة نوحْ

لا تغُرِّك المتاهات..

ولا صَهْد أيَّامِكْ

عُمْر اللي سقَّى ما ماتْ

وآهو زرْعُه قدامِكْ

شُوبش يا الْخَطَّافِينْ

خبِّيتوا الخِطَّة فين؟

وبيِبْنُوا قلوعِكْ من جوعِكْ

وبيرْمُولْنا الخُطَّافِينْ

يا ريتني كنت ملِك النَّحلْ..

أقول الحقّ مرّة.. وأموتْ

عينيكي فدّانين من نَخْلْ

ومن مِيتَى النّخِل بيموتْ؟

والبت عروسة بكَارْ

زفُّوها بضرْب النَّارْ

حواليها خَدَمْ وِوْلادْ

فارْشين وَرْد وسِجَّادْ

واخْدينْهَا بالخِنَاقَة

والمَهْر أَلْف نَاقَة

والنِّيل اِعْوَجّ ولَفّ

ويا وِيل الزّرع إنْ جَفّ

صوتَكْ هَجَّة مهجَّة

والشَّاطِر يِتْهجَّى

فِيض يا نِيل في جنادِلْ

ما تصُبِّش في الجرادِلْ

ده البِتّ عروسة بكَارْ

خَطَفُوها بضرْب النَّارْ

مشاركة